Pak para ditës së Shën Valentinit në Divjakë ndodhi një ngjarje jashtë vëmendjes së të gjithëve. Një vajzë vetëm 16 vjeçe, i dha fund jetës së saj duke u vetëhelmuar. Arsyet e vetëvrasjes adoleshentja i morri me vete duke lënë të tronditur të gjithë. Ndërsa nxënësit e klasës së saj nuk mundet të bëjnë dot më mësim në ambientet e mëparshme.
Familja Murrizi ka hapur dyert e mortit pas ndarjes nga jeta të vajzës së tyre. Justina Murrizi, 16 vjeçarja fëmija i dytë i familjes, u vetëhelmua me fotoksinë mbrëmjen e së martës.
1 orë pasi e kishte pirë, vajza është paraqitur në Poliklinikën e Divjakës në gjendje të vetëdijshme por të rëndë, pasi mjeku nuk ka mundur t’I masë pulsin dhe tensionin.
“Erdhi në datën 12, e zbardhur mund të themi. Kur në fraksionin e sekondës mendon çfarë do t’i bësh dhe kur ne i bënim injeksione ajo thoshte më lini, dua të vdes”, tha mjeku i poliklinikës Divjakë, Dritan Jani.
-U tha në ndonjë moment arsye, pse?
“Jo absolutisht. Të afërmit që e shoqëronin prindërit e saj, thoshin pse ajo gocë kështu sepse ishte vajzë që i plotësoheshin të gjitha kërkesat, vajzë që përqafohej me babain cdo ditë”, tregon mjeku i poliklinikës Divjakë, Dritan Jani.
Në shkollën e mesme ku ndiqte mësimet Justina mbizotëron heshtja dhe pikëpyetjet. Asnjë nuk ka përgjigje për pyetjen ‘Pse’ ndodhi.
Në klasën XI-1 nuk zhvillohet më mësim. Shokët e 16 vjeçares kanë ndryshuar klasën, pas mungesës së saj.
“Ne vajzat i kemi të gjitha të mira, por Justina ishte dhe nxënëse shumë e mirë, vajzë e sjellshme. Fjalët më të mira të mundshme kam për Justinën dhe jam shumë e hidhuruar që sështë më mes nesh. Ka qenë në shkollë ditën e fundit dhe është larguar bashkë me shoqet”, tregon drejtoresha e gjimnazit “Miti Zoi Zaka”, Ana Nako.
Orën e fundit mësimore e kaloi me shokun, njëkohësisht kushëririn e saj, që tregon për Top Channel se s’kishte asnjë lloj dyshimi se Justina do t’i bënte keq vetes pasi të ndaheshin nga njëri tjetri. Për të gjithë, 16 vjecarja nuk shfaqej e shqetësuar dhe dëshira e saj për të shpëtuar jetët e të tjerëve si mjeke, u shua me vendimin tragjik që mori në momente dobësie.
Po pse ndodhi?
“Nuk e di, ditën e hënë ka qenë sëmurë dhe mori leje, kemi ikur bashkë në shtëpi, vetëm kur e marrim vesh. Nuk e di, na ka lënë pa fjalë”, tregon kushëriri i saj.
“Kemi qenë shoqe shumë të mira. Nuk më tregonte asgjë, ishim shoqe klase po nuk tregonte”, tha shoqja e saj./T.CH
