Biznesmeni Rezart Taçi i cili është shpallur në kërkim nga SPAK pasi akuzohet për pastrim parash dhe grup të strukturuar kriminal do të kthehet së shpejti në Shqipëri që të dorëzohet.
Kështu u shpreh ai në ABC, ndërsa shtoi se këtë do ta bëjë që t’i japë “kënaqësinë dikujt” që sipas tij po lobon me para të pista, që ta shohë për disa ditë të arrestuar, pa dhënë një emër.
I pyetur për kë bëhet fjalë konkretisht, Taçi deklaroi se për momentin ka vetëm indicie, por në momentin që do të ketë fakte situata do të jetë ndryshe.
“Ditën që do të kem faktin nuk do të ketë Zot, fe dhe normë burrërore që do ta shpëtojë. Kur të kem fakte do të jeni të informuar. Ka vite që më kërkon familja që të kërkoj azil politik,” tha ai.
Sa i përket akuzave, biznesmeni i hidrokarbureve i mohoi ndërsa shtoi se ka besim tek drejtësia shqiptare dhe te pafajësia e tij. Sipas Taçit, ai është kontaktuar nga një mik i tij i cili i ka kërkuar që të hap një llogari bankare në Shqipëri, megjithatë Taçi hedh poshtë akuzën që t’i ketë dhënë ndihmë në këtë proces.
Mësohet se miku i kishte kërkuar të hapte një llogari për një person të tretë, ndërsa ky i fundit ka deklaruar se nuk ka asnjë rol, pasi i ka drejtuar në rrugën ligjore sipas tij.
“Pse kanë ardhur paratë në mënyrë ligjore, të bllokohen paratë nëse është bërë gabim. Ku është roli im këtu?”
Sa i përket personit që ka bërë transfertën e parave, ai tha se bëhet fjalë për një biznesmen në fushën e naftës që e furnizonte vite më parë.
