Albin Kurti nuk do të kandidojë në zgjedhjet e 14 shkurtit në Kosovë.
PZAP-i (Paneli Zgjedhor për Ankesa dhe Parashtresa) ka vendosur kundër ankesave të subjekteve politike lidhur me moscertifikimin e kandidatëve të tyre, ku pretendohej se një kandidat mund të jetë në listë, nëse vendimi gjyqësor me të cilin është dënuar nuk prodhon pasoja juridike.
Deri tani PZAP-i ka publikuar vetëm vendimin për Partinë e Ashkalinjve për Integrim dhe aty shpjegon se një person nuk mund të jetë kandidat për deputet edhe nëse vendimi gjyqësor për atë person nuk ka prodhuar pasoja juridike.
Lideri i LVV-së Albin Kurti është i dënuar me burgim me kusht, gjë që llogaritet se vendimi gjyqësor nuk ka prodhuar pasojë juridike. Por, sipas PZAP-it edhe në këtë rast, sipas Nenit 29, pikës 1, shkronja q, të Ligjit për Zgjedhjet e Përgjithshme në Kosovë, një personi që është i dënuar për vepër penale me vendim të prerë nuk i lejohet kandidimi për deputet.
