Një person është arrestuar pasi akuzohet se ka marrë peng një shkodran për shkak se ky i fundit i kishte një borxh të pashlyer. Jo zyrtarisht flitet për një shumë 3-4 mijë euro.
Informacionet e para bëjnë të ditur se mes Dedë.Gj, banor i Velipojës dhe Pjetër Nakës, ka pasur një marrëveshje për kthimin e borxhit mbrëmjen e së hënës.
Palët janë takuar, por situata shumë shpejt është përshkallëzuar pasi viktima nuk i ka kthyer borxhin. Në këtë moment, personi që dyshohet si autor i kësaj pengmarrjeje ka nxjerrë armën dhe nën kërcënimin e saj e ka detyruar viktimën të futet në bagazhin e makinës.
Policia është vënë në ndjekje gjatë gjithë natës dhe ka arritur ta arrestojë pengmarrësin vetëm mëngjesin e sotëm.
