Pas debatit të ditëve të fundit nga komuniteti i aktorëve, kryebashkiaku i Tiranës, Erion Veliaj ka deklaruar sot se kryeqyteti do të ketë shumë shpejt një teatër të ri.
Veliaj shtoi se teatri i ri që do të ndërtohet në Tiranë nuk do të ketë kullë. Kryebashkiaku u shpreh se në vendin që Teatri Kombëtar ndodhet sot, do të ndërtohet një i ri shumë shpejt, por pa kullë.
“Tirana do të ketë një Teatër Kombëtar modern, pa kullë në vendin ku është teatri sot. Do të jetë ndër më të mirët në Europë. Por si cdo projekt, duhet durim” deklaroi ai.
Artistët ditët e fundit kanë protestuar duke kundërshtuar largimin nga godina e sotme e Teatrit Kombëtar dhe zhvendosjen te “Turbina” si edhe kërkuan sqarime dhe transparencë për projektin e teatrit të ri.
