Shkolla “Luigj Gurakuqi”, e vetmja shkollë speciale për fëmijët e kryeqytetit ka nisur të rikonstruktohet.
Shkolla është ndërtuar në vitin 1994, por për shkak të mos mirëmbajtjes gjendet në kushte tejet të degraduara, çka e ka bërë të nevojshme ndërhyrjen në të. Kryetari i Bashkisë së Tiranës, Erion Veliaj ka inspektuar punimet. Ai theksoi nevojën për të garantuar kushte dhe standarde mësimore për dhjetëra fëmijë me aftësi të veçanta.
“Në qytetin e Tiranës të gjithë fëmijët i trajtojmë njësoj. Sic po ndërhyjmë në të gjitha shkollat kemi hapur kantier ndërtimi dhe në këtë shkollë speciale”
Faza e rikonstruksionit do të zgjasë gjatë 3 muajve të verës dhe do të jetë gati në shtator, me fillimin e vitit të ri shkollor.
“Duam që shtatori të na gjejë me të gjitha klasat speciale dhe një kënd lojrash gati për të gjithë fëmijët specialë”
Veliaj garantoi se Bashkia e Tiranës do t’i trajtojë njëlloj dhe do të ofrojë të njëjtat standarde për të gjithë fëmijët. Ai kërkoi gjithashtu lirimin e çdo hapësire publike që është zënë pranë shkollave, duke u sugjeruar qytetarëve që të shfrytëzojnë lehtësirat që ofron Bashkia e Tiranës për banesa sociale apo kredi. Veliaj deklaroi se pjesë e mbështetjes së bashkisë për këto shtresa është edhe programi i punësimit për personat me aftësi të kufizuar.
