Kryetari i Bashkisë së Tiranës Erion Veliaj në takimin e Këshillit Ekonomik të Tiranës ka deklaruar se Sheshi Skënderbej do të jetë gati për zgjedhjet e ardhshme 2017.
Kreu i Bashkisë u shpreh se viti 2017 do të shënojë një rritje të buxhetit, kjo falë mirëadministrimit të të ardhurave pa rritur asnjë taksë.
“Buxheti i ardhshëm do të jetë edhe më ambicioz. Kemi parashikuar që të rrisim me 10 për qind buxhetin. Në 100 kantiere sot, janë 10 mijë persona të punësuar. Besoj se edhe bashkia ka një rol aktiv. Ne do të shkojmë duke mos propozuar asnjë rritje taksash apo rritje tarife për biznesin dhe për familjarët. Do të shkojmë me rritje të buxhetit thjesht duke rritur bazën, duke shpresuar që menaxhiimi i mirë do të na çojë në një qytet më të suksesshëm”, tha ai.
Veliaj theksoi se do të rriten dhe pagat mininale të punonjësve të bashkisë. “Për të gjithë pagat mininale të bashkisë, nga 220 mijë lekë do të shkojnë më 375 mijë lekë”, tha Veliaj.
Më tej Veliaj sqaroi lehtësitë për biznesin për vitin 2017, të cilat priten që t’i japin një tjetër ritëm rritjes ekonomike.
Bashkia e Tiranës do të lehtësojë edhe procedurën e regjistrimit të një biznesi të ri pranë DPTTV-së, duke përgjysmuar paralelisht edhe afatet e regjistrimit.
