Projekt i Bashkisë së Tiranës “Qyteti lexon”, ka vijuar në njësinë nr. 8 të kryeqytetit, ku ka përfunduar edhe rikonstruksioni i bibliotekës e cila është pasuruar me tituj të rinj librash.
Për kryetarin e bashkisë Erion Veliaj, investimi në lexim është investimi më i mirë për të ardhmen dhe se biblotekat nuk do të shërbejnë vetëm si salla leximi, por edhe si qendra rinore. “Nga të gjitha investimet që kemi bërë në Bashkinë e Tiranës, kjo është më e vogla por më e dobishmja, sepse korsitë e biçikletave, rrugët, ndriçimi prishen dhe rregullohen, kurse dija e leximi është diçka e pazëvendësueshme”, tha Veliaj.
Ai shtoi se libri, ndryshe nga teknologjia, ofron dije më të qëndrueshme. Kjo është arsyeja pse Bashkia e Tiranës ka nisur një projekt, i cili synon rikonstruktimin e të gjitha bibliotekave nëpër lagje, duke i shndërruar ato edhe në qendra rinore, që mund të shërbejnë për aktivitete artistike, sociale, kulturore, sportive, etj.
“Kemi filluar rigjallërimin e bibliotekave dhe fillimisht po i pasurojmë me libra, falë dashamirësisë së donatorëve si Shtëpia Botuese “Dudaj” dhe “Raiffeisen Bank”. Brenda këtij viti do të fillojmë edhe me rikonstruksionin fizik, që ambientet të jenë më të përshtatshme dhe të manovrueshme për të shërbyer edhe si qendra rinore ose komunitare, ku e gjithë Njësia 8 mund të mblidhet për nevojat që ka në komunitet, për të diskutuar planin urbanistik, projektin e sheshit “Skënderbej” e të tjera”, shtoi kryebashkiaku.
E pranishme ishte edhe përfaqësuesja e Shtëpisë Botuese “Dudaj”, dhuruese e shumë prej titujve të rinj të kësaj biblioteke, me qëllim nxitjen e leximit kryesisht te të rinjtë.
