Bashkia Tiranë ka hapur një terminal të ri autobusësh në Qytetin Studenti, për të gjitha linjat që operojnë në zonën e juglindjes.
Kryetari i Bashkisë Erion Veliaj sqaroi se ambienti i hapur ka dy role pasi gjysma është një terminal i përkohshëm për linjat e Pogradecit, Librazhdit apo Korçës ndërsa gjysma tjetër ka 100 vende parkimi për qytetarët, profesoratin, vizitorët në “Qytetin Studenti”, për vrapuesit nga liqeni.
“I kemi dhënë përgjigje shqetësimit të shumë qytetarëve që jetojnë në “Qytetin Studenti”, atyre që vizitojnë fëmijët e tyre këtu, që frekuentojnë fakultetet në këtë zonë apo që vijnë për vrap nga liqeni, duke aplikuar tarifën më të ulët sot në Tiranë: tre orë/50 lekë.”-ka deklaruar Veliaj
Sheshi më parë administrohej nga privatët, të cilët e kishin zënë sipërfaqen dhe i tarifonin ata që parkonin aty sipas dëshirës ndërsa tani administrohet nga “Tirana Parking” dhe do u kushtojë qytetarëve më pak sesa të parkojnë në rrugët e kryeqytetit.
“Ky shesh ka qenë shumë i ndotur, ishte pamja e parë në hyrje të vendit ku jeton e ardhmja e Shqipërisë. Një shesh me mbeturina, me papastërti dhe inerte, çka binte në kontrast me çfarë po përpiqemi të kultivojmë me studentët që jetojnë këtu. Por, dua të ftoj të gjithë qytetarët që të mos parkojnë më te liqeni! Le të përdorin sa më shumë këtë ambient, ta lënë makinën këtu. U bën mirë për shëndetin, por edhe ulin trafikun e panevojshëm”– është shprehur më tej Veliaj.
