Kryetari i bashkisë ka vendosur kështu ti paguaj të moshuarës shumën e parëve që i detyrohet shtetit për tregtinë e paligjshme të qepëve
Kryetari i Bashkisë së Tiranës Erjon veliaj ka vendosur ti paguajë nënës së gjobitur shumë që i detyrohet shtetit për tregtinë e paligjshme të qepës. “Kryetari I bashkisë ka vendosur që ta shlyejë ai gjobën prej 500 lekësh, që Policia Bashkiake vendosi sot ndaj gruas së moshuar”, theksohet në njoftimin për shtyp të bashkisë Tiranë.
Përmes një njoftimi për mediat, bashkia ka sqaruar rrethanat në të cilat është gjobitur e moshuara që po tergtonte perime në oborrin e një pallati në kryqytet.
“Duke u nisur nga rasti që po qarkullon së fundi në mediat sociale, mbi aksionin e Policisë Bashkiake për lirimin e hapësirave të zëna publike dhe disiplinimin në tregje të posaçme të tregtarëve që shesin në rrugë e trotuare, Bashkia e Tiranës gjen rastin të informojë dhe t’u bëjë edhe një herë thirrje tregtarëve që vijnë nga jashtë Tiranës, që për të tregtuar produktet e tyre të shfrytëzojnë një nga 16 tregjet ekzistuese të bashkisë.
Bashkia e Tiranës po punon çdo ditë për krijimin e më shumë tregjeve me standarde në higjienë e infrastrukturë, në mënyrë që askush të mos detyrohet të shesë më nëpër rrugët e trotuaret e qytetit. Për këtë arsye, Bashkia e Tiranës do të përurojë nesër tregun e parë të këtij lloji në Njësinë Administrative nr. 3, si dhe po publikon edhe hartën e 16 tregjeve (bashkëlidhur) që ndodhen në gjithë qytetin e Tiranës.
Lidhur me rastin e gruas së moshuar, e cila u gjobit sot nga Policia Bashkiake për tregtim të produkteve ushqimore në trotuar, duke bllokuar hyrjen e shkallëve të një pallati, Bashkia e Tiranës dëshiron të informojë opinionin publik se rasti në fjalë ishte denoncuar nga vetë banorët e pallatit, të cilët kërkonin lirimin e hapësirës nga shitësit që tregtonin prej kohësh produktet e tyre ushqimore aty, edhe pse vetëm pak metra më tutje ndodhet tregu i Njësisë Administrative nr.10, i cili aktualisht është bosh”, thekson Bashkia e Tiranës.
Pamja e një nënë të moshuar që gjobitej nga polici sepse shiste në rrugë qepë, ka shkaktuar zemërim të madh të qytetarëve në rrjetet sociale. Komente të shumta kanë shoqëruar foton e shpërndarë mijëra herë nëpër rrjetet socilae me mesazhe të forta kundër qeverisë.
