Kryebashkiaku Erion Veliaj tha se investimet që po bëhen në Tiranë janë përgjigja më e mirë ndaj çdo përpjekje që me anë të debateve politike tentojnë të ndalojnë ritmin e punës.
Teksa ka inspektuar punimet në një tjetër shkollë të re në kryeqytet e cila pritet të hapë dyert për nxënësit vitin e ri shkollor,Veliaj shtoi se ata që sot kërkojnë qeveri teknike apo pushtet në tavolinë duhet të kujtojnë që deri dje e kishin Tiranën, mund t’i kishin bërë të gjithë këto shkolla, të gjitha këto punë.
Veliaj theksoi se shkolla e re vjen me një trefishim të kapaciteteve të saj, duke synuar të ndikojë ndjeshëm në uljen e numrit të shkollave që japin mësim me dy turne.
Shkolla “Hoxha Tahsin” pritet të jetë gati në shtator për rreth 1 mijë nxënësit që e frekuentojnë atë. Shkolla e re do të ketë 4 kate me të gjitha ambientet e domosdoshme mësimore, si laboratorë dhe palestra me standarde. Gjithashtu, shkolla do të ketë edhe një terren sportiv të jashtëm.
