Kryetari i Bashkisë së Tiranës, Erion Veliaj i bëri thirrje qyetarëve të Tiranës që në këto ditë të nxehta vere të kursejnë ujin e pijshëm.
“I ftoj qytetarët që ta kursejmë ujin e pijshëm, është një mall që kushton dhe është e papranueshme që në pikun e verës, vazhdojmë të përdorim ujë të pijshëm në lavazhe për të larë makina, për të ujitur e vaditur. Ndaj jemi treguar jashtëzakonisht të rreptë dhe do të vazhdojmë të jemi të rreptë më këdo që shpërdoron ujin. Nuk e bëjmë këtë sepse u kemi shpallur luftë lavazheve, por sepse na dhimbsen qytetarët që duan ujë”, deklaroi Veliaj, ndërsa kërkoi nga qytetarët që të denoncojnë çdo ndërhyrje të paligjshme dhe keqpërdorim të ujit të pijshëm.
Në fjalën e tij në nisje të punimeve për shtrirjen e rrjetit të ri të ujësjellësit në Njësinë Administrative Nr. 4, Veliaj tha se u mbajt premtimi që 12 mijë familje të kenë ujë të pijshëm.
“Lajmi i mirë është që këtë verë, teksa banorët e kësaj zone shkojnë me pushime, bashkia do të vijojë punën, që kur ata të kthehen nga pushimet, investimi të ketë mbaruar, në mënyrë që 12 mijë familje, jo vetëm të kenë ujë me periudha më të gjata kohe, por sigurisht edhe ujë më cilësor”, shtoi Veliaj.
Gjithashtu, ai shtoi se ky investim është një dëshmi e përkushtimit dhe kujdesit të Bashkisë së Tiranës që në këtë vit të parë emergjence të bëjë çdo ditë nga një punë, për t’i dhënë zgjidhje problemeve më urgjente të qytetarëve të Tiranës.
“Kjo është puna konkrete e ditës së sotme dhe besoj se mesazhi që kemi marrë është: sa më shumë punë, sa më pak fjalë, sa më pak sherre dhe sa më shumë rezultate konkrete. Kjo është mënyra se si Tirana ecën përpara. Jemi krenarë që vijmë pas 1 viti para banorëve me një premtim të mbajtur, por duhet të pranojmë që ka ende shumë për të bërë”, tha Kryebashkiaku.
