Ish-kryeministri Sali Berisha ka zbuluar të tjera detaje nga vdekja e 32-vjeçarit Lear Kurtit mesnatën e së mërkurës në kryeqytet. Gjatë një deklarate për mediat, Berisha tha se i riu është dhunuar nga efektivët dhe se këto të fundit nuk kanë njoftuar ambulancë, duke e dërguar “viktimën e tyre direkt në morg”.
Ai ironizoi duke e krahasuar me rastin e Klodian Rashës teksa shtoi “ja kur të thonë se gjetën një revole në kanal”.
Më herët, Berisha kërkoi një minutë heshtje në Kuvend për ngjarjen e rëndë, por kërkesa e tij nuk u pranua.
“Ky është akti i disatë që vrasës me uniformë u marrin jetën të rinjve në rrugë, në makinat e policisë apo komisariat. Ky akt shëmtuar është një dëshmi tjetër se Shqipëria qeveriset nga një bandë e udhëhequr nga Rama dhe miku i familjes, Çuçi. Me këtë rast, u bëj thirrje të gjithë të rinjve të ngrihen fuqishëm në një protestë të madhe, të protestojnë kundër kësaj vrasje mizore, kundër kësaj vrasje me torturë, e kanë vdekur në makinën e policisë. E kanë çuar të vdekur në spital. Nuk kanë kryer as gjërat më minimale dhe siç e patë ju, parlamenti i tyre refuzoi të mbajë një minutë heshtje. Qëndroi në anën e vrasësve, jo të viktimës. Edhe ky është një akt i shëmtuar. Nuk ka sesi, nuk janë rastësi këto përsëritje periodike. Policia është e mbushur me vrasës dhe trafikantë, është e mbushur me patronazhistë kriminelë. Ndaj ndodhi këto. Po të marrësh vrasjet nga policia në harkun 18-mujor, janë më të shumta se në SHBA dhe Europë të marra së bashku. Ndaj këtu mbetet vetëm protesta dhe përballja me këta hajdutë për shpëtimin e jetës. Absolutisht që është vrarë, policia gënjen si në rastin e Klodian Rashës, ja kur të thonë se gjetën një revole në kanal, E kanë futur në makinë dhe në komisariat e kanë sjellë pa ndenja ose të vdekur. S’kanë marr ambulancën, nuk e kanë thirrur, se kanë dërguar në spital, viktimën e tyre e dërguan me makinë në morg. Gjithçka tregon se është dora kriminale e vrasësve me uniform, i morën shpirtin një 32-vjeçarin, kishte mënyra të tjera, përveçse ta vrisnin”, tha Berisha.
