Kryeministri Edi Rama njoftoi sot mbatjen e maskës me detyrim edhe në rrugë dhe në çdo ambient tjetër jashtë shtëpisë.
Në një konferencë për shtyp, kreu i qeverisë njoftoi se të enjten nis zbatimi i këtij urdhri, ndërsa shkelësve do t;ju vijë gjobë në faturën e dritave.
“Nga e enjtja maskat të detyrueshme për të gjithë, në cdo moment jashtë shtëpisë, trotuar, shesh. Policia e Shtetit në bashkëpunim me policinë bashkiake do të implementojë këtë masë duke ndëshkuar të gjitha rastet e shkeljeve që do të faturohen te dritat. Për punonjësit e shtetit masa do të jetë edhe më e rëndë sepse ata duhet të jenë të parët që të tregojnë shembullin në zbatimin e ligjeve”, u shpreh Rama.
Në përfundim të fjalës së tij, Rama ndau edhe një batutë me gazetarët për deklaratën e ministrit Blendi Klosi se valët e muzikës përhapin Covid-19.
“Të mërkurën do të publikohet akti normativ edhe me shqetësimet tuaj specifike, po sikur të ulej pak zëri nëpër studio, duke mbajtur parasysh edhe këshillën e ministrit për punën e valëve do të ishte edhe kjo një punë e madhe”, tha Rama.
