Ministria e Financave organizon tryezë debati USAID-Qeveri lidhur me Partneritetin Publik privat
Pas dhënies me koncesion të disa shërbimeve, qeveria ka vendosur të njejtën gjë edhe për ndriçimin publik dhe plazhet publike. Ministri i Financave, Arben Ahmetaj, tha se kostot për këto dy sektorë nuk mund të përballohen nga bashkitë pasi janë të larta. Ahmetaj theksoi se përsa i përket pushtetit vendor janë të njëjtat parime që ka pushteti qëndror për të bërë një PPP apo për të bërë një koncesion.
“Ndriçimi publik është shumë i rëndësishëm, ka shumë kosto. Ka shumë bashki, po të kishim kryetar bashkie do të na kishin thënë menjëherë koston e ndriçimit public. Sigurisht një mundësi shumë e madhe për të kaluar në inovacione qoftë teknologjike qoftë kontraktuale dhe duke përmirësuar ndriçimin në qytete po duke ulur edhe koston patjetër dhe ka të tilla shumë. Bota e qytetëruar njeh shumë inovacione në këtë aspekt.
E dyta është menaxhimi i plazheve. Nganjëhere duket kaq e thjeshte dhe kthehet kaq e vështirë. Si ka mundësi që në bregdetin shqiptar nuk ka një standard të dhënies me qira në fakt, por në rastin konkret po e quajmë një kontratë partneriteti publik privat, ku të marri përsipër privati atë që duhet ta bënte bashkia por që nuk e bën dot për shkak të mungesës së fondeve dhe për shkak të mungesës së disiplinës në treg, në plazhet e Shqipërisë. Pra do të duhet që administrata vendore duhet të kalojë në një nivel proaktiv. Nuk kemi akoma kapacitetet e duhura tek vendor, por edhe tek qendrori”, tha Ahmetaj. Ministri i Financave, bëri këtë deklaratë në një tryezë debati USAID-Qeveri të mbajtur në Tiranë.
