Letër ministrit të Drejtësisë në lidhje me tragjedinë e Fierit, ku ka patur një urdhër mbrojtje për burrin vrasës.
Nga Majlinda Bregu
Zoti ministër i Drejtësisë,
Një grua është flakur dje nga ballkoni i shtëpisë si plaçka më e pavlefshme, nga një Burrë-Shtazë i radhës.
Mediat thonë sot se Viktima ka patur një Urdhër Mbrojtje nga Gjykata e Fierit, pas denoncimeve të mëparshme për ushtrim dhune ndaj saj.
Urdhëri i mbrojtjes, kur një grua e dhunuar kërkon ndihmë, e ndalon kriminelin burrë që pavaresisht nga “soji i hallit” që paraqet si shkak për shtazërinë:
– të largohet nga banesa
– të mos i afrohet bashkëshortes dhe fëmijëve
– të ruajë distancën nga shtëpia, ku ajo jeton bashkë me fëmijët apo nga vendi i punës dhe shkollës së fëmijëve.
Unë jam e qartë se fuqia jonë e veprimit dhe reagimit kundër një kërcënimi si dhuna ndaj grave që është terrorizëm i qartë, i pastër, i çmendur, në vend të jetë po aq e egër sa egërsia e Shtazëve, po rrezikon të mbetet vetëm tek keqardhja njerëzore.
Por, ky rast po më tmerron nga ky detaj: Urdhëri i Mbrojtjes!
Zoti ministër,
Kush është ai gjyqtar që paska lëshuar një urdhër mbrojtje që e lë burrin që gruaja e padit për dhunë, të jetojë në një shtëpi me të, derisa ta hedhë nga ballkoni????
Nëse kjo është tërësisht e vërtetë, padinë për këtë gjyqtar, do ta bëj vetë!
