Si po shkatërrohet dita-ditës ura simbol për qytetarët e Shkodrës
Ura e Bunës është një ndër objektet me vlera artistike e historike në qytetin e Shkodrës. Është një ndër objektet e rëndësishme për kujtesën e këtij qyteti. Është monument kulture, por ajo po rrënohet dhe në mënyrë paradoksale po vidhet për skrap. Në vitin 1889 kryetari i bashkisë së asaj kohe, Bektash At Kazazi, miratoi ndërtimin e kësaj ure e projektuar nga inxhinier Ali Beu. Për ndërtimin e saj u përdor këmbë çimentoje të lidhura me tela hekuri, si dhe dërrasa për shtrimin e pjesës së sipërme të saj.
Kanë kaluar 717 vjet prej kohës, kur është ndërtuar dhe është përdorur deri pak vite më pare, kur u ndërtua ura e re që lidh Shkodrën me rrethinat e saj e më pas me qendrat e tjera urbane. Sot, Ura e vjetër e Bunës, është në gjendje të mjerueshme. Si shumë objekte të tjera me vlera historike në Shqipëri, edhe kjo urë po përjeton shkatërrimin dhe mungesën e plotë të vëmendjes së autoriteteve për ta mirëmbajtur atë. Rrënimi i saj vazhdon prej vitesh bashkë me braktisjen nga autoritet që do të duhet të kishin vënë dorë për ta mirëmbajtur referuar vlerave që ajo ka.
Siç e shihni në këto foto, dërrasat janë të dëmtuara dhe krijojnë hapësira të rrezikshme për kalimtarët në të gjithë gjatësinë e saj. Ndërkohë që në krahët e saj anësorë duket se si një pjesë e hekurit është hequr pasi është vjedhur për skrap nga persona të papërgjegjshëm. TV Rozafa ka pyetur Drejtorinë rajonale të kulturës në Shkodër për braktisjen e kësaj ure, por ata kanë vetëm një përgjigje, atë klasiken: “nuk kemi fonde edhe pse projekti është gati”. Të njëjtën përgjigje ka edhe nga Bashkia Shkodër.
