Shumë prej pemëve më të vjetra, sot, janë pemë ulliri. Në mbarë vendin, gjenden ullishte që janë mbjellë nga ilirët, grekët e lashtë apo romakët, që ende lulëzojnë.
Në Shqipëri, mendohet se ullinjtë më të lashtë kanë moshë mbi 2000-vjeçare dhe gjenden kryesisht në zonat e Tiranës dhe Laçit.
Në ullishtën e fshatit Gjorm të Laçit, gjenden rreth 6 mijë rrënjë ulliri, ku disa prej tyre janë shekullore.
Për njërin prej tyre thuhet se është më i vjetri, në Shqipëri dhe jo vetëm.
Ymer Hysa nga fshati Gjorm, thotë se për nga përmasa që ka kjo pemë mund të kemi të bëjmë me një ulli dy mijë vjeçar, pronë e Haxhi Likës.
Përmes programit “Në shtëpinë tonë”, Hysa u bën thirrje autoriteteve përgjegjëse, veçanërisht Ministrisë së Bujqësisë dhe asaj të Mjedisit, që ta marrin në mbrojtje këtë pemë dhe ta shpallin monument natyror ose kulturor.
/top-channel.tv/
