Detaje tronditëse dalin në dritë pas vrasjes së Besnik Hidës dy ditë më parë në Lushnjë.
News 24 bën me dije se Hida kishte njoftuar policinë një javë para vrasjes, duke iu dhënë pamjet filmike të të kërkuarve. Policia ishte njoftuar për lëvizjet e vrasësve të dyshuar të tij.
Për vrasjen e Zamir Latifit e Jurgen Hoxhës në tetor të vitit 2017, policia shpalli në kërkim si autorë të dyshuar Orges Bilbilin dhe Laert Haxhiun të cilët megjithëse paraqesin një rrezikshmëri të madhe për shoqërinë vijojnë të jenë ende të lirë.
Kanë qenë vetë të afërm të viktimës të cilët kanë paralajmëruar policinë 2 javë para ngjarjes se 2 autorët e dyshuar të vrasjes se Zamir Latifit endeshin të lirë në Lushnjë.
Edhe vete viktima ka qenë i ndërgjegjshëm për kërcënimin që i kanosej.
Burime nga policia thanë për News 24 se që prej tetorit të 2017 e deri një javë para ekzekutimit vetë Besnik Hida ka njoftuar disa herë policinë për lëvizjet e 2 të shpallurve në kërkim si autorë të vrasjes së nipit të tij.
Hida ka paraqitur në polici edhe materiale filmike, se si 2 të shpallurit në kërkim lëviznin të pa shqetësuar në Lushnjë me makina luksoze si “Tuareg” dhe “BMË X6”. Por denoncimet ranë në vesh të shurdhër dhe mosveprimi i komisariatit Lushnjë solli një tjetër viktimë.
Makina tip “Fiat” e përdorur në vrasje ishte e grabitur më 24 shtator në Tiranë. Dy grabitësit në ikje e sipër i kanë shpëtuar një patrulle policie në Elbasan, e cila konstatoi mjetin e grabitur dhe tentoi ta ndalojë.
Mbetet ende e paqartë se si ky mjet i vjedhur pa iu ndërruar targat mundi të kalojë nga kryeqyteti deri në Lushnjë i pa shqetësuar nga patrullat e policisë të cilat kishin marrë informacion për karakteristikat e tij.
Filli i këputur i hetimeve për ngjarje të rënda kriminale të ndodhura më herët dhe mosveprimi në kohë i policisë ka bërë që bilanci i vrasjeve në vend të rritet.
Vetëm këtë vit, janë regjistruar 58 viktima nga 49 ngjarje kriminale me armë.
Ndërsa ngjarja nuk është zbardhur ende, pista kryesore e policisë është ajo e hakmarrjes. /BW
