Gjyqtarja e Elbasanit Enkeleda Kapedani, e cila u bë e famshme për videot në Tik Tok, do të dalë sot për herë të dytë në seancë publike në Komisionin e Pavarur të Kualifikimit.
Seanca është përcaktuar në orën 10:00, teksa trupi gjykues përbëhet nga Genta Tafa Bungo, Pamela Qirko, Brunilda Bekteshi. Kjo është hera e dytë që gjyqtarja Kapedani del në KPK.
Komisioni i Pavarur i Kualifikimit vendosi të riçelë hetimin për Kapedanin për verifikimin e disa rrethanave të reja që dolën nga hetimet.
Në janar të këtij viti Inspektorati i Lartë i Drejtësisë ka pranuar kërkesën e gjyqtares së Elbasanit, për arritjen e një marrëveshjeje, ku pranonte shkeljen disiplinore në këmbim të një mase disiplinore më të butë. Gjyqtarja Kapedani është dakordësuar me ILD për masën e pezullimit për gjashtë muaj, ku do të marrë një pagë minimale.
