Simboli i “Autochthonous”, banerit të bërë të famshëm në ndeshjen e vitit 2014 Serbi – Shqipëri, nuk do të lejohet të shfaqet në stadiumin “Şükrü Saracoğlu”, të Stambollit.
Vendimi është marrë nga autoritetet turke, të cilat i ka bërë të ditura për publikun shqiptar Federata Shqiptare e Futbollit.
Shqipëria luan këtë të premte ndeshjen e 7 në grup, vendimtare për synimet për kualifikim. Me 3 fitore dhe 3 humbje, kombëtarja ka 9 pikë dhe renditet tani në vend të katërt, ndërsa Turqia kryeson grupin H me 15 pikë.
Njoftimi i FSHF
Federata Shqiptare e Futbollit dëshiron të njoftojë opinionin publik dhe të gjithë tifozët shqiptarë që do të jenë në stadium mbrëmjen e sotme për ndeshjen Turqi-Shqipëri, se përtej gjithë insistimit dhe kërkesave të vazhdueshme ndaj zyrtarëve të ndeshjes, një pjesë e materialeve të tifozëve nuk mund të lejohen në stadium. Turqia ka një ligj sportiv që nuk lejon vendosjen e shumë materialeve në stadium.
Kemi marrë konfirmimin se do të lejohen daullet për çdo grupim, flamurët shqiptar dhe shallet me logon e flamurit Kombëtar. Nuk lejohet asnjë megafon, baner ultrasësh i çdo tifogrupi, baner me imazhe personale, veshje që nuk kanë lidhje direkte me flamurin kuqezi siç mund të jenë ato me imazhin Autochtonus.
Nuk lejohen çantat e krahut dhe të shpinës, të gjithë duhet ti lënë në hotel ose në autobusat më të cilat udhëtojnë, pasi nuk është mundësuar një pike grumbullimi për ruajtjen e tyre. Lajmërojmë tifogrupet e organizuara se nisja për në stadium do të bëhet në orën 18:00, për arsye të kontrollit të rreptë që do të ushtrohet në 3 pikat e kontrollit përpara hyrjes në stadium. Brenda stadiumit do të gjeni pika shitje për freskuese dhe ushqime të shpejta.
Duke ju falenderuar për mbështetjen e pakufishme që jepni gjithmonë ekipit Kombëtar shqiptar, shpresojmë në mirëkuptimin tuaj dhe në mbështetjen tuaj të përhershme.
#NeJemiNjë
