Ministri për Rindërtim Arben Ahmetaj pohoi se Turqia do t’i vijë në ndihmë Shqipërisë së prekur nga tërmeti tragjik i 26 nëntorit duke ndërtuar 500 shtëpi në Laç.
Në një konferencë të përbashkët për mediat, të mbajtur pas takimit me ministrin turk të Mjedisit dhe Urbanizimit, Murat Kurum, Ahmetaj theksoi se projekti i rindërtimit ka filluar të marrë jetë dhe mendohet të përfundojë rreth muajit korrik.
“Puna për rindërtimin ka filluar, 500 banesa për ata që kanë humbur shtëpitë, me ambjente komerciale, ndërtesë për bashkinë dhe shkollën. Është një konceptim urbanistik dhe teknologjik që do i mbijetojë kohës dhe do jetë një risi e cila që mund të kthehet në model për projekte të tjera. Procesi i rindërtimit po vijon me hapa të shpejta , projekti me Turqinë mendohet të përfundojë rreth muajit korrik, sigurisht kjo na vendos në presion të nevojës së qytetarëve për të ndjekur afatet“- u shpreh Ahmetaj.
Ndërsa ministri turk në fjalën e tij nënvizoi se Shqipëria është në vëmendjen e presidentit Recep Tayyip Erdogan. “Shqipëria është në vëmendjen e Presidentit Erdogan. Do të ndihmojmë familjet që t’i kthehen jetës normale. Ngushëllime familjarëve.Projekti jonë do të mbarojë brenda 6 muajve, do të kemi një koordinim me qeverinë shqiptare”-tha Murat Kurum.
