Më shumë se 130 media janë mbyllur të mërkurën me një vendim nga qeveria turke. 3 agjenci lajmesh, 23 radio, 15 kanale televizive, 45 gazeta, 15 revista dhe 29 agjenci botuese dhe shpërndarëse. Gjatë ditës së djeshme, qeveria turke urdhëroi arrestimin e 47 gazetarëve të gazetës më të madhe opozitare të mbyllur pak muaj më parë, “Zaman”.
Dje po ashtu , qeveria turke ka vendosur që të përjashtojë nga ushtria 1,684 ushtarakë, nga të cilët 149 gjeneralë dhe admiralë dhe gati gjysma oficerë të rangut të lartë të ushtrisë në vend.
Përjashtimet e tyre ishin parashikuar edhe më herët nga qeveria, e cila priste të merrte një vendim të vështirë gjatë verës por tashmë duket se gjendja e jashtëzakonshme e shpallur nga Presidenti i ka hapur rrugë vendimeve të tilla.
Më shumë se 15 mijë njerëz janë arrestuar që pas datës 15 korrik në Turqi. Numri i zyrtarëve është 8,113, të cilët po qëndrojnë në qelitë e paraburgimit në pritje të gjykimit.
