Presidenti amerikan Donald Trump dhe ai rus Vladimir Putin kanë shtrënguar duart për herë të parë në fillim të samitit të G20-s që mbahet në Hamburg të Gjermanisë.
Më vonë ata pritet të zhvillojnë një takim i planifikuar për një orë, ku në fokus do të jetë riparimi i lidhjeve amerikano-ruse, të dëmtuara nga ndërhyrja e supozuar ruse në zgjedhjet amerikane.
Sipas NBC News, gjasat janë që në takim të jenë të pranishëm vetëm 4 persona të tjerë: sekretari amerikan i Shtetit, Rex Tillerson; ministri i Jashtëm rus, Sergei Lavrov; dhe dy përkthyesit.
Ende nuk dihet nëse ata do të prononcohen për mediat, apo nëse takimi mes tyre do të zgjatet.
