Partia Demokratike ka reaguar për ngjarjen e sotme, ku një shtyllë e tensionit të lartë u shkatërrua me tritol në Laç, ndërsa Spiropali dhe Balla thanë se pas kësaj qëndrojnë Berisha dhe Basha.
Në reagimin e selisë blu thuhet se pas një shpifjeje të tillë, fshihet dëshpërimi i kryeministrit, Edi Rama.
“Neveri për propagandën me tritol të Edi Ramës. PD hedh poshtë me neveri shpifjen e Taulant Ballës dhe Elisa Spiropalit se pas shpërthimit me tritol të shtyllave të tensionit të lartë qëndron PD dhe opozita.Një shpifje e tillë tregon dëshpërimin e thellë të shefit të Taulantit dhe të Elisës, i cili e ka lidhur fatin me krimin dhe porositësit e tritolit. Nëse ai nuk ka dorë në këtë propagandë helmuese, Edi Rama, i cili ka kontroll të plotë mbi policinë, shërbimin sekret dhe prokurorinë, duhet të zbulojë pa vonesë ata që kanë urdhëruar dhe kanë vendosur tritolin në shtyllën e tensionit të lartë”, thuhet në njoftimin e PD.
