Shtetet anëtare të Bashkimit Evropian vijojnë diskutimet mbi ecurinë e reformave në Shqipëri, përpara se të arrijnë një qëndrim të përbashkët për nisjen e mbylljes së kapitujve të parë të negociatave të anëtarësimit.
Sipas raportimit të portalit dtt-net.com, gjatë takimit të zhvilluar këtë të martë nga Grupi i Punës për Zgjerimin dhe Vendet Kandidate për Anëtarësim në BE (COELA), tre shtete anëtare nuk kanë dhënë ende miratimin për Raportin e Vlerësimit të Përkohshëm të Standardeve (IBAR) për Grupin 1 të kapitujve negociues, të njohur si “Bazat”.
Ky grup përfshin Kapitullin 5 për Prokurimin Publik, Kapitullin 18 për Statistikat, Kapitullin 23 për Gjyqësorin dhe të Drejtat Themelore, Kapitullin 24 për Drejtësinë, Lirinë dhe Sigurinë, si dhe Kapitullin 32 për Kontrollin Financiar.
Burime diplomatike në Bruksel bëjnë me dije se diskutimet mes vendeve anëtare do të vijojnë edhe në takimin e radhës të planifikuar për 22 maj, ndërsa ende nuk janë bërë publike emrat e shteteve që kanë rezerva apo detajet e mosmarrëveshjeve mbi progresin e reformave.
Një tjetër burim diplomatik konfirmoi se grupi COELA nuk ka arritur ende konsensus dhe se vetëm pas dakordësimit të plotë dosja do t’i kalojë nivelit të ambasadorëve të vendeve anëtare në COREPER.
Pesë kapitujt e Grupit 1 konsiderohen ndër më të rëndësishmit në procesin e integrimit, pasi lidhen drejtpërdrejt me funksionimin e sistemit gjyqësor, luftën kundër korrupsionit dhe garantimin e shtetit të së drejtës.
Diskutimet në Bruksel zhvillohen në një moment tensionesh politike në Shqipëri, mes opozitës dhe qeverisë së kryeministrit Edi Rama. Opozita ka ngritur akuza për korrupsion, lidhje me krimin e organizuar, keqpërdorim fondesh publike dhe manipulim zgjedhor.
Në qendër të debatit politik mbetet edhe çështja e ish-zëvendëskryeministres dhe ish-ministres së Infrastrukturës dhe Energjisë, Belinda Balluku, për të cilën opozita pretendon se po mbrohet politikisht nga qeveria përballë hetimeve të SPAK lidhur me disa tendera në sektorin e ndërtimit.
Sipas raportimit, pas presionit të opozitës dhe kritikave nga institucione të BE-së dhe eurodeputetë të ndryshëm, Edi Rama pranoi largimin e Belinda Balluku nga detyra, por ende nuk ka pranuar kërkesën për heqjen e imunitetit parlamentar të saj.
Shqipëri hapi kapitujt e parë të negociatave me BE-në në tetor të vitit 2024 dhe qeveria shqiptare synon anëtarësimin e plotë në union deri në vitin 2030.
gijotina.com/
