“Dialog për Çështjen Çame, thotë Ilir Meta, po ne jemi gati për dialog, madje jemi gati edhe të falim, por i lutem zotit Meta të na thotë me kë të dialogojmë, sepse pala greke nuk e pranon reciprocitetin.”
“Eshtrat e gjyshërve e të afërmëve tanë duhet të jenë të barazvlefshëm me ato të ushtarëve grekë, ndaj dhe ne nuk pranojmë në asnjë rast që të ngrihen varrezat greke në Shqipëri pa u pranuar nga pala greke varrezat e të parëve tanë të varë nga genocidi grek.”
Ky është qëndrimi i prerë i kryetarit të PDIU-së, Shpëtim Idrizi, në përgjigje të pyetjes së gazetarit Sokol Balla se përse PDIU është kundër ndërtimit të varrezave të ushtarëve grekë në Shqipëri. I ftuar në Top Story, Idrizi tha se ka patur një marrëveshje mes palës shqiptare dhe asaj greke në vitin 1996, sipas të cilës lejohej ndërtimi i varrezave të partizanëvë të Çamërisë në Greqi, por kjo nuk u zbatua kurrë. Ai foli për domosdoshmërinë e reciprocitetit në marrëdhëniet mes dy vendeve duke shprehur bindjen se PDIU nuk do të tërhiqet nga të gjitha kërkesat që ka parashtruar për zgjidhjen e Çështjes Çame.
Komisioni hetimor për tragjedinë e Çamërisë
Në mbledhjen e sotme të Byrosë Parlamentare është diskutuar kërkesa e PDIU-së për ngritjen e një komisioni të posaçëm për zbardhjen e krimeve ndaj popullsisë së Çamërisë. Idrizi tha se në mbledhje ishte rënë dakord që të kalohej në një tjetër procedurë, ngritjen e një komisioni hetimor për krimet ndaj popullsisë së Çamërisë, referuar faktit që nuk ka një precedent në Kuvend me komisionet e posaçme. Idrizi shprehu bindjen se të gjitha partitë politike e mbështesin këtë komision, pasi në përbërje të tij, siç u shpreh ai do të marrin pjesë të gjitha partitë parlamentare. Idrizi nuk e sheh si provokim këtë kërkesë, madje ai shton se ka të tjera kërkesa shumë të rëndësishme në kuadër të zgjidhjes së Çështjes Çame.
Identifikimi i të zhdukurve
Përmes Organizatës së Kombeve të Bashkuara, PDIU ka nisur përpjekjet për të gjetur të zhdukurit e tragjedisë çame. Ndërkohë që një kompani britanike e mbështet procesin. Gjetja dhe identifikimi i viktimave të zhdukura të Çamërisë do të synohet të realizohet përmes ADN-së duke shfrytëzuar të gjithë dokumentacionin që ekziston në të gjitha arkivat ndërkombëtare.
Marrëdhëniet me Metën
Zgjidhje me dialog, është kërkesa që erdhi nga kryetari i LSI-së, Ilir Meta për Çështjen Çame pas vizitës së tij në Greqi. I pyetur nga gazetari Balla për këtë deklaratë, Idrizi u shpreh: “Ne jemi gati për dialog, madje jemi gati edhe të falim vrasësit tanë, por ju lutem juve, zotit Meta e kujtdo tjetër të na gjeni se me kë të dialogojmë. Siç e keni parë dhe ndjekur nga pala greke nuk ka asnjë mundësi dialogu, sepse ata nuk e pranojnë reciprocitetin.”
Ndërsa sa i përket marrëdhënieve të acaruara me Metën dhe LSI-në, Idrizi tha se PDIU nuk ka asnjë problem me LSI-në. Në përgjigije të deklaratës së ministrit të LSI-së, Ylli Manjani se Idrizi është deputet që vjen nga PD, ndërsa zgjedhjet PS e LSI i ka fituar me Ben Blushin, Idrizi theksoi që nuk e identifikon qëndrimin e LSI-së me hallakatjen e Manjanit. Idrizi ka dhe një shpjegim për fitoren e zgjedhjeve të 2013: “Nëse paska funskionuar aq mirë aleanca mes Manjanit e Blushit në Elbasan, atëherë si shpjegohet ai rezultat aq fantastik i PDIU-së në Elbasan në zgjedhjet e 2013?!”
Duke iu kthyer Çështjes Çame, Idrizi foli për persekutimin e popullsisë së Çamërisë edhe gjatë kohës së komunizmit. Ai tha ndër të tjera që nëse Napoleon Zerva i vrau fizikisht, Enver Hoxha i vrau moralisht, e cila është gjëja më e poshtër që mund t’i bësh një populli. Duke iu referuar retorikës së shtuar në politikën shqiptare në mbrojtje të Çështjes Çame, Idrizi theksoi: “Jam krenar që kemi trimëruar politiken shqiptare në raport me Greqinë”, duke kujtuar se para disa vitesh as që mund të përmendje Çështjen Çame.
