21 emigrantë janë zbarkuar mëngjesin e sotëm në Leçe
Tashmë trafiku i refugjatëve sirianë nëpërmjet detit për në Itali është realitet. Mediat italiane njoftuan se 21 emigrantë kanë zbarkuar mëngjesin e sotëm në Leçe, 16 burra, 4 gra dhe 1 minorene. Guardia di Finanza ka ndaluar 2 skafistët, 1 shqiptar dhe 1 grek të cilët po merren në pyetje. Sipas mediave lokale trafikantët i kanë çuar refugjatët në breg dhe më pas janë larguar. Pas njoftimit, karabinierët kanë zhvilluar kërkime në tokë, ndërsa motoskafët e Guardia di Finanza dhe të rojës bregdetare kanë filluar kërkimet në det. Në një distancë jo shumë të largët, pak milje më në jug, është identifikuar dhe bllokuar një varkë. Në bord ndodheshin një shtetas grek dhe një shtetas shqiptar, të cilët janë ndaluar për marrë në pyetje. Dyshohet se ata janë 2 skafistët, që kanë çuar në Castro emigrantët, por ende po hetohet. Mësohet se emigrantët janë me kombësi somaleze, iraniane dhe siriane, të cilët janë dërguar në një qendër pritje në Otranto.
