Eugena Tomini, shefe e Survejancës e Shërbimit të Inteligjencës Epidemike në ISHP e ftuar në emisionin e mëngjesit në Abc News shpjegoi procedurën që ndiqet për gjurmimin e kontakteve të personave të prekur me koronavirus.
“Duhet të kalojë një periudhë deri në 6 ditore nëse kjo nuk kalon kemi fallco negativitet përkundrejt testimit të hershëm të kontaktit. Për rrjedhojë këtë person e lëmë të lirë të qarkulloje por ndërkohë mund të jetë mbartës pa prezencë të virusit në sekrecione dhe e transmetojnë në popullatë. Fakti që personave iu merren tamponët në ditën e gjashtë dhe të shtatë ndiqet një protokoll i përcaktuar”, tha Tomini.
Ajo gjithashtu foli edhe për vaksinën, që kompania Modena pretendon se ka prodhuar, që sipas së cilës tashmë ndodhet në fazën e dytë të vaksinimit. Sipas saj, është e nevojshme që vaksina të kalojë të gjithë fazat e domosdoshme, në mënyrë që të mos ketë efekte anësore tek qytetarët. Ajo tha se dhe Shqipëria ndodhet në listën e pritjes të vendeve në rast se një vaksinë efektive ndaj koronavirusit prodhohet.
“Shqipëria është pjesë e kësaj organizate përsa i përket dhe vlerësimit, monitorimit të vaksinave po dhe nëpërmjet UNICEF që e mbështet kalendarin kombëtar të vaksinave. Ka qenë Ministria e Shëndetësisë që ka mbështetur marrjen e vaksinës kundrejt të gjitha grupeve të riskut, e njëjta situatë do të jetë dhe nëse kjo do të jetë një ndër vaksinat që do të sundojë tregun për covid-19. Ndërkohë të gjitha vendet e OBSH janë në listën e pritjes nëse kjo vaksinë do të jetë e aplikueshme dhe sigurisht dhe Shqipëria do të jetë pjesë e pritjes së vaksinave që mund të jenë të aplikueshme. “, tha Tomini.
