Thomas Strakosha që sot është portieri më i ri i Brentford në Premier League. 27-vjeçari la Lazion pas 10 vitesh, duke kaluar në ishull, në kampionatin më të fortë në Europë.
Klubi i ri i portierit të Kombëtares kuqezi bën me dije se Strakosha do jetë i lidhur për katër vite me skuadrën, duke u bashkuar me ekipin në fazën përgatitore në Gjermani në ditët në vijim.
Strakosha ka zhvilluar më shumë se 150 paraqitje me Lazion në Serie A, ndërsa numëron edhe 19 prezenca me Kombëtaren. Trajneri i Brentford, Thomas Frank u shpreh i lumtur me këtë nënshkrim.
“Jam i kënaqur që kemi arritur të nënshkruajmë me një portier të mirë. Ai ka qenë numri një te Lazio për një kohë të gjatë, gjë që është shumë mbresëlënëse.
Ka luajtur në Serie A dhe garat evropiane dhe do ta sjellë atë përvojë me vete. I përshtatet modelit tonë të portierit dhe vjen në një mjedis të mirë me David Raya dhe Matthew Cox, që shtyjnë njëri-tjetrin çdo ditë drejt përmirësimit”.
