Si pasojë e thatësirës rreth 40 kuintal peshq në rezervuarin e fshatit Xibrakë, në Cërrik, kanë ngordhur si pasojë e mungesës së oksigjenit, pasi uji i këtij rezervuari ka arritur pikën e vdekjes.
Gentian Xhelili, i cili ka marrë liçencën për mbipopullimin e këtij rezervuari, shprehet se një situatë e tillë nuk i ka ndodhur asnjëherë më parë.
“Mendoj se kjo ka ardhur nga mungesa e oskigjenit, mosrënia e shirave dhe burimet tokësore që kanë qenë janë shteruar. Është hera e parë që ndodh dhe dëmet shkojnë 500-600 mijë lekë të reja. Urojmë të bjerë shi, pasi vetëm kjo mund ta ndalojë këtë katastrofë. Duhet lënë një pikë vdekjeje, siç i themi në gjuhën e peshkimit, që edhe gjallesat të jetojnë”, thotë Xhelili.
Rezervuari i Xibrakës përdoret gjithashtu për vaditje dhe duket se edhe gjatë këtij procesi nuk është respektuar kuota e lejuar për të mos kërcënuar gjallesat.
