Presidenti i ri i Kosovës deklaroi se do të rikandidonte vetëm në rast se kreu i shtetit zgjidhet nga populli, përjashton edhe kthimin në qeveri apo parti
Presidenti i zgjedhur i Kosovës, Hashim Thaçi, deklaron se nuk do të rikandidojë për postin e Presidentit. Thaçi sqaron se do të rikandidonte vetëm nëse presidenti do të zgjidhet nga populli. Në një intervistë për “Shih Programin” me gazetarin Enkel Demi, e cila do të jepet sot në mbrëmje në TVSH, Presidenti i ri i Kosovës ka deklaruar se në përfundim të këtij mandati, nuk do të kthehet në qeveri. Madje ai deklaron se nuk do të kthehet në PDK, Partia Demokratike e Kosovës.
Në intervistë ai flet edhe për Gjykatën Speciale duke sqaruar se nuk ka asnjë frikë prej saj. Thaçi shprehet se UÇK nuk ka bërë krime. “Kemi bërë luftë për qëllime kombëtare dhe jo fetare”, ka theksuar Thaçi.
Me shumë gjasë, Hashim Thaçi ka vendosur të mbyllë karrierën e tij politike me këtë mandat Presidenti të Kosovës. E kundërta mund të ndodhë vetëm nëse do të ketë ndryshime në Kushtetutën e Kosovës për të zgjedhur kreun e shtetit nga populli.
