Pas lëkundjeve të forta të datave 21 dhe 22 shtator, të cilat goditën vendin tonë dhe veçanërisht rajonet e Durrësit dhe Tiranës, nisi edhe inspektimi i të gjithë godinave të dëmtuara.
Një nga godinat ku punojnë 35 punonjës rezulton të jetë në gjendje emergjence.
Bëhet fjalë për Drejtorinë e Policisë Shkencore, një godinë cila gjendet pranë Gardës së Republikës e cila prej më shumë se një viti ka kaluar si pronë nën juridiksionin e bashkisë së Tiranës, por ende nuk po merren masa për sistemimin në një ambient të ri.
Në datë 29 shtator Instituti i Ndërtimit pas inspektimit i ka dërguar një shkresë urgjente ministrisë së Brendshme, nëpërmjet të cilës tregon se është konstatuar që kjo godinë është goditur rëndë në strukturë dhe në themele.
Sipas konkluzioneve të firmosura nga vetë drejtori i Përgjithshëm i këtij institucioni, inxhinier Agron Hysenlliu dhe inxhinier Gerti Çela, ky objekt merr statusin “i pabanueshëm” dhe duhet të merren masa urgjente për evakuimin e personeli dhe të të gjithë mjeteve të punës.
Përveçse kësaj shkrese zyrtare që posedon SYRI.net janë njoftuar gojarisht, edhe drejtuesit e lartë të ministrisë së Brendshme dhe posaçërisht sekretari i Përgjithshëm Plarent Ndreca.
Por tashmë kanë kaluar 8 ditë nga kjo shkresë dhe ndërkohë që specialistët e fushës thonë se pllakat tektonike në Adriatik që shkaktuan valën e tërmeteve janë ende në stabilizim e sipër dhe rreziku ende nuk është larguar plotësisht, në drejtorinë e Policisë Shkencore personeli punon nën frikë dhe panik.
