Pas alarmit të përhapur nga Shtetet e Bashkuara të Amerikës për përmbatje plastike, edhe Shqipëria tërheq nga tregu çokollatat Snickers, Mars dhe Milky Way, duke u bërë shteti i 56 në botë që merr këtë vendim.
Përfaqësuesi i Autoritetit të Kontrollit Ushqimor Granit Sokolaj tha në studion e Report TV se ky institucion pranë Ministrisë së Bujqësisë ka urdhëruar dy kompanitë importuese që brenda 24 orëve të tërheqin nga tregu tre llojet e çokollatave që kanë datën e skandencës nga 9 qershori i vitit 2016 deri në 8 janar të 2017-ës.
Edhe pse nuk ka asnjë sinjalizim zyrtar për “alertin” e konsumimit të këtyre çokollatave në Shqipëri nga dy autoritetet e sigurisë ushqimore pranë Komisionit Europian (European Food Safety Authority (EFSA) dhe Food and Feed Safety Alerts (RASFF), AKU – sqaron Sokolaj – ka marrë këtë vendim për të garantuar shëndetin e konsumatorit shqiptar.
Sokolaj tha se AKU nuk mund të kryejë analizat për të parë nëse çokollatat brenda datës së skandencës qershor 2016-janar 2017 shfaqin rrezik apo jo, pasi ky institucion nuk ka laboratorë për analizimin e përmbajtjes plastike.
Dy kompanitë që importojnë në vendin tonë tre llojet e çokollatave më të famshme në botë Snickers, Mars dhe Milky Way janë Inter Trade & Distribution dhe Interbrand.
Mbetet në përgjegjësinë e tyre – theksoi përfaqësuesi i AKU-së – që të marrin masa për t’i heqin nga tregu këto produkte. Sipas tij do të verifikohen edhe korrespondencat e kompanisë distributore me prodhuesin.
Report Tv
