Gjykata e Tiranës ka caktuar masën e sigurisë për tre të rinjtë të cilët dhunuan dhe tentuan të digjnin me benzinë një të mitur në Tiranë. Mësohet se, gjykata ka lënë në burg Ardit Çelën, bashkëjetuesin e të miturës, ndërsa Enea Hoxha dhe 17-vjeçari D.M, shokët e 25-vjeçarit Ardit Çela, janë lënë me detyrim paraqitje.
Referuar dosjes së prokurorisë, ka qenë e mitura e cila ka bërë kallëzim ndaj bashkëjetuesit së saj dhe shokëve të tij për ngjarjen e cila fatmirësisht nuk përfundoi në tragjedi. Sipas saj i dashuri e ka spërkatur me benzinë poshtë pallatit të banesës së saj.
Në dëshminë e saj përpara grupit hetimor ajo është shprehur se Çela e ka spërkatur me një bidon të vogël që mbante në xhep. Sipas 16-vjeçares, ajo ka kuptuar që është lagur me benzinë pasi e ka ndjerë nga era, e menjëherë është larguar duke kërkuar ndihmën e banorëve.
Jo zyrtarisht mësohet se Çela ka pasur dyshime se e dashura e tij e tradhtonte dhe për këtë shkak ka tentuar që ta lëndojë atë, duke e spërkatur me benzinë, me qëllim djegien. Sa i takon miqve të tij, ata akuzohen për përkrahjen e autorit të krimit.
