Vijon të ketë tensione mes dy kryebashkiakëve të Devollit të cilët pretendojnë se posti që ata zotërojnë është i ligjshëm.
Që në 06:30 të ditës së sotme ka mbërritur në institucionin e Bashkisë Eduard Duro, fituesi i zgjedhjeve të 30 Qershorit nën siglën e PS-së, i rrethuar nga një numër shumë i madh i forcave të rendit.
Ndërkohë jashtë godinës qëndrojnë kryetari aktual Bledion Nallbati i shoqëruar nga administrata e Bashkisë.
Në një prononcim për mediat, Nallbati shprehet se ky institucuion është pushtuar nga forca speciale, të cilët nuk lejojnë administratën të hyjnë dhe të bëjnë punën e tyre.
“Bashkia u dhunua në prezencë të deputeteve dhe prefektit të Korcës. Brenda bashkisë ka forca speciale. Unë jam kryetari i ligjshëm i bashkisë, i zgjedhur nga 59 përqind e qytetarëve. Do jem këtu cdo ditë, 24 orë në ditë. Do të vazhdoj tju shërbej qytetarëve. Bashkia është pushtuar. Nuk di cka ndodhur me dokumentacionin që ndodhet në zyra. Administrata nuk mund te hyje ne bashki dhe te nise punen nën terrorin e policis”, është shprehur Nallbati për mediat.
Ndërkohë Kryetari i ri i Bashkisë së Devollit, Eduard Duro thotë se prezenca e policisë në ambientet e institucionit ka ardhur pas njoftimit të ish kryebashkikut Bledjon Nallabti se do të kishte grumbullim.
“Nga ana e ish-kryetarit është njoftuar se do të kishte një grumbullim njerëzish, ka disa punonjës bashkie dhe familjarët e tyre. Ata duhet të ishin në zyrat e tyre. Ish-kryetari njoftoi se do të kishte tubim para bashkisë. Ditën e shtunë kam pasur takime me disa punonjës të bashkisë, të cilët kanë ardhur dhe ditën e shtunë e kanë bërë ditë pune për të marrë informacion mbi organikën. Jam në pritje që punonjësit të vijnë në zyrë. Policinë e kam njoftuar unë. Nuk është normale por edhe grumbullimi i njerëzve nuk është normal. Punonjësit e bashkisë janë të ftuar të hyjnë në zyrë, i kam ftuar personalisht. Ndoshta nuk hyjnë se u vjen zor nga ish-kryetari ose janë detyruar nga persona të tjerë. Punonjësit do të hyjnë në punë, është detyrim ligjor”, u shpreh Duro.
