Protestuesit “rrethojnë” Qeverinë, u bashkohet Zaev
Tensionohet situate në Shkup. Vetëm pak orë pas vendimit të Presidentit Ivanov, për të amnistuar politikanët e akuzuar, në kryeqytetin maqedonas kanë shpërthyer protestat. Protestuesit janë grumbulluar fillimisht para Presidencës, ku edhe pse ka patur forcave të shumta policore, kanë hedhur vezë dhe sende të tjera të forta, duke thyer xhamat e Presidencës. Më pas protesta është zhvendosur para ndërtesës së kryeministrisë, ku me protestuesit është bashkuar edhe lideri i LDSM Zoran Zaev. Në situatën e ndezur kanë reaguar edhe liderat e partive shqiptare. Ali Ahmeti ka thënë se “I ashtuquajturi President Ivanov duhet ta tërheq vendimin e tij menjëherë per arsye se një vendim i tillë i nxituar dhe i pamenduar cënon Marrëveshjen e Shkupit, provokon thellimin e krizës politike në vend”. Ndërkohë Menduh Thaci deklaroi se: “Pres të kemi zhvillime dramatike, pres ndëryrje pak më radikale të bashkësisë ndërkombëtare dhe situata mund të shkojë në pa kthim”.
Më shqetësim e ka përcjellë situatën e krijuar në Maqedoni edhe faktori ndërkombëtar. Përfaqësuesja e lartë e BE-së Federica Mogherini ka kërkuar takim me kryetarin e Maqedonisë, Gjorgje Ivanov.Takim me Ivanovin kanë kërkuar edhe ministri i jashtëm gjerman Steinmeier si dhe diplomatë të SHBA-së, Britanisë së Madhe e Gjermanisë në Shkup, të cilët janë refuzuar nga Presidenti maqedonas me arsyetimin se axhenda e tij është e ngarkuar.
