Një tender i dyshimtë është hapur ditët e fundit nga Agjencia e Shërbimeve Funerale në vendin tonë.
Mësohet se është bërë kërkesë për blerjen e 136 arkivolëve, për përballimin e covid-19. Autoriteti kontraktor kërkon që këto arkivolë të jenë të përmasave të ndryshme; 56 arkivolë të vegjël, për fëmijë deri në 1 vjeç, 75 me përmasa standarte, ndërsa 5 me përmasa më të mëdha se standarti.
Mirëpo diçka nuk shkon në këtë tender, pasi kërkesa nga autoriteti kontraktor (për 136 arkivolë) nuk është në përputhje me realitetin e pasojave të koronavirusit në vendin tonë.
Në Shqipëri, që nga përhapja e pandemisë, kanë humbur jetën 27 persona, shumë larg shifrës 136, dhe është për t’u theksuar se nuk ka asnjë fëmijë deri në 1 vjeç të prekur me covid-19, e jo më që të ketë humbur jetën. Ndërkohë kërkohen 56 arkivolë për këtë kategori.
Sipas këtij prokurimi të “çuditshëm”, dyshimet që lindin janë nëse realiteti i të prekurve nga koronavirusi në Shqipëri është i ndryshëm nga ai që i serviret publikut, ose vetë tenderi është i dyshimtë, dhe ka më tepër gjasë të jetë e dyta.
Në dokumentet e tenderit të shpallur gjatë ditës së sotme, thuhet se “mallrat do të dorëzohen në magazinën e autoritetit kontraktor që ndodhet në Rr.‘‘Ymer Ndregjoni afër Poliklinikës nr. 10, për verifikim nëse u përgjigjen specifikimeve të autoritetit kontraktor.
Operatori ekonomik i renditur i pari, duhet të paraqitet pranë autoritetit kontraktor brenda ditës se nesërme të punës nga momenti i shpalljes fitues”.
