TIRANË- Kompania e policisë shtetërore “Illyrian Guard”, në pronësi të ministrisë së Brendshme, u raportua se do të ketë në fokus të saj rehabilitimin e policëve, të cilët nuk përmbushin kriteret për të qenë pjesë e Policisë së Shtetit. Por duket se ky tender fsheh një tjetër plan, edhe më fitimprurës… bëhet fjalë për një tender të dyshimtë i cili është shpallur nga Ministria e Brendshme lidhur me pajisjen me kamera të institucioneve shtetërore.
Ndërkohë që u përfol shumë që me krijimin e “Ilyrian Guard” të gjithë policët, të cilët vetë ministri Lleshaj i cilësoi si “barkderra” do të punësohen për ruajtjen e godinave të shtetit, që gjithsesi do të pajisen me kamera.
Kush është kompania që do të jetë fituesja e paracaktuar e tenderit?
“Elektrosek”, një kompani e themeluar në vitin 2011, që ka si klient kryesor Postën Shqiptare, nga e cila vjel çdo vit miliona para nga taksapaguesit do të “veshë” me kamera edhe godinat shtetërore, me një vlerë rekord prej 5 miliardë lekësh të vjetra. Pas 370 milionë $ në tenderin e Postës, “Elektrosek” do të vendosë kamera vetëm jashtë institucioneve, lista e të cilave ende nuk është publikuar, ndërsa ambientet brenda institucioneve do të lihen në ndërgjegjien e “keqbërësëve” potenciale por edhe pse jo të hajdutëve…
Nga ana tjetër me “skemën” e përgatitur nga Ministria del blof roli i efektivëve të forcave “Illyrian”. Nëse çdo ambient i jashtëm do të ketë kamera, atëherë përse duhen edhe efektivët? Gjithsesi nëse ndodh diçka brenda, në vendet ku ka vërtet diçka për të humbur, dokument a gjetkë, “Ilyrian Guard” do të mund të bëjnë vetëm diçka: të ngrenë supet. Pra askush nuk na garanton se vendosja e kamerave do të garantojë mbrojtjen e godinës. Tjetër problem, që është zhdukur vetëm për t’i bërë ‘qokën’ e radhës me miliona kompanisë “Elektrosek” është ai i sistemeve ekzistuese. Ato para kanë dalë njëherë nga xhepi i taksapaguesëve shqiptare, dhe do të dalin sërish edhe më shumë për të hyrë në llogari të kompanisë. Ndoshta 370 milionët e “dhuruara” nga Posta Shqiptare nuk kanë qenë të mjaftueshme për të ngopur babëzinë e drejtuesve të kompanisë, që njihen në publik si dyshja misterioze, Ilir Mane dhe Jonad Marini.
Por ky tender me një vlerë kaq të lartë, ka edhe të tjera probleme teknike. Një prej tyre është edhe fakti, që nuk flitet fare për pjesën teknike të sistemit qendror, në mënyrë që ofertuesit të dinë se si të përpilojnë ofertën e tyre dhe se cilat kamera duhet të ofrojnë për të qenë sa më shumë të përshtatshëm me sistemin qendror. Problem thelbësor ky se në tender nuk përcaktohet as nga do të merret shërbimi i internetit për pamjet filmike duke qenë se flitet për kapacitete të mëdha mbulimi.
S’dihet nëse do të ndërtohet një rrjet i brendshëm tërësisht i ri për t’ju përshtatur kamerave të reja apo do të përdoret vetëm rrjeti ekzistues.
Në tender viher re se janë parashikuar vetëm 2 lloje sistemesh, me 8 ose me 16 kamera. Po çfarë do ndodhë në rastet nëse godinat janë të mëdha; do të blihen 2 sisteme me 16 kamera, apo 4 sisteme me 8 kamera? Për të njëjtën godinë jemi duke folur akoma ë…
Kamera të reja, një rrjet i brendshëm tërësisht i ri, shërbim i ri interneti të gjitha do të blihen të reja pavarësisht se çfarë ka në gjendje institucioni. Gjithashtu do të paguhet edhe infrastruktura aktuale që godinat kanë. Përllogaritja është e thjeshtë: DYFISH shpenzime!
Një tjetër ‘kleçkë’ është që operatori duhet të përgjigjet për të gjitha problematikat brenda një orë në Tiranë, 5 orë në disa qarqe, dhe 12 orë në disa të tjera…
Çfarë do të thotë kjo?
Godinat në Tiranë janë më të rëndësishmë sesa në ndonjë qark tjetër të vendit që është pak më larg qendrës? A mund të pritet vërtetë 12 orë që “Elektrosek” të zgjohet nga gjumi dhe t’u rregullojë problemet? Brenda godinave le të bëhet kasaphanë s’ka gjë.
Nga tenderi kuptohet qartë dhe pastër diçka, tenderi është bërë për t’ju përshtatur kompanisë që deri dje voli Postën Shqiptare, që mori paratë për sigurinë dhe më pas disa posta u vodhën ditën në diell. Pra, jo se tenderi për sistemin e sigurisë dhe pajisjes me kamera nuk bëhej dot sipas standarteve. Ai mund të bëhej shumë mirë i tejet-programuar, por kjo gjë s’mund të ndodhte pasi tenderi i është përshtatur mënyrës sesi funksionon kompania private. Pra edhe para, edhe sa më pak kosto për fituesin e paracaktuar.
Ajo që dihet me siguri është fakti se ky tender është paracaktuar dhe burime pranë MB e konfirmojnë këtë. A do të jetë Elektrosec kompania fituese? Presim që Sandër Lleshaj të na provojë të kundërtën… sa për konkurrentët… atyre iu mbetet vetëm të shohin “Elektrosek” që të mbushë sirtarin e saj me paratë e vjelura, kësaj here nga një tjerër institucion, por që sërish paguhet nga xhepat tanë.
