Robert Ndrenika dhe Arben Derhemi kanë votuar kundër shembjes së Teatrit Kombëtar, por edhe pro. Firma të hedhura në kohë të ndryshme, që krijojnë paqartësi tek të gjithë admiruesit e dy prej aktorëve më të dashur për publikun shqiptar.
Në peticionin e sotëm ka kanë firmosur dy aktorët, shkruhej: “Ne aktorët, regjisorët dhe përfaqësuesit e artit skenik shqiptar, dëshirojmë t’iu bëjmë me dije dhe të shprehim vullnetin tonë me anë të këtij peticioni të hapur, se jemi për ndërtimin e një Teatri të ri Kombëtar, bashkëkohor dhe modern, ku t’i shërbej të gjithë komunitetit artistik teatror dhe publikut artdashës.”
Ndërsa më herët, dy aktorët që identifikohen si babë e bir për shkak të roleve shumë të dashura për shqiptarët në “Njerëz dhe Fate”, kanë kryesuar listën e firmave për propozimin që Teatri Kombëtar të shpallet monument Kulture.
“Propozojmë shpalljen e kompleksit që përfshin Tetarin Kombëtar dhe Teatrin Kombëtar Eksperimental “Kujtim Spahivogli” Monument Kulture të Aksit Kryesor dhe Qendrës Historike të Qytetit të Tiranës”.
