Nisin kontrollet tatimore për mallrat dhe materialet nga 5 janari 2016 edhe pse ligji ishte konsideruar antikushtetues
Drejtoria e Tatimeve ka vendosur të mos e zbatojë vendimin e Gjykatës Kushtetuese, që pezulloi ligjin për procedurat tatimore. Drejtoria e tatimeve ka urdhëruar kontrollin e inventarëve të bizneseve nga data 5 janar. Mazhoranca kishte miratuar ndryshimet në ligjin për procedurat tatimore ndër të cilat parashikohej monitorimi i inventareve të bizneseve në çdo kohë.
Sipas ndryshimeve, parashikohej që nëse konstatohet se bizneset kanë mospërputhje të inventarëve me gjendjen e mallit, tatimet mund të ndërhyjnë në çdo kohë dhe të kërkojnë rregullimin e situatës. Gjykata Kushtetuese e ka vlerësuar si antikushtetues ligjin e ndryshuar, miratuar nga mazhoranca pak javë më parë, ku parashikoheshin një sërë ndryshimesh të tjera.
Pavarësisht vendimit të Gjykatës Kushtetuese, tatimet njoftuan bizneset se kontrollet tatimore për mallrat dhe materialet nisin nga 5 janari 2016 dhe se në këtë kontroll do të bëhet verifikimi i inventarit të mbylljes së vitit, me atë fizik.
