Tanket gjermane, në ofensivën turke ndaj kurdëve

Qeveria gjermane po ndeshet me apele për të ndaluar eksportin e armëve drejt Turqisë, pasi u publikuan raporte se tanket gjermane “Leopard” po përdoreshin në sulmin kundër kurdëve të YPG.

Disa politikanë gjermanë kanë kërkuar që çdo lëvizje për të miratuar një rifreskim të marrëveshjes për tanket, të ndalet. Forcat turke nisën një sulm në veri perëndim të Sirisë të shtunën.

Ndërkohë që debatet në Gjermani janë ndezur vetëm dy javë pasi ministrat e jashtëm të të dyja vendeve premtuan se do të përmirësonin marrëdhëniet dypalëshe.

Marrëdhëniet mes dy vendeve anëtare të NATO-s janë përkeqësuar në mënyrë dramatike vitet e fundit. Sipas raporteve, të premten, Berlini po përgatitej të miratonte një kërkesë nga Turqia që prodhuesi gjerman i armatimeve Rheinmetall, të rishikonte tanket e tij “Leopard 2” për t’i bërë më pak vulnerabël ndaj shpërthimeve.

Tanket mendohet se janë përdorur nga Turqia edhe kundër grupit shteti islamik në Siri. Sidoqoftë, ekspertët e mbrojtjes kanë pretenduar në mediat germane se imazhet e fundit nga operacioni dega e ullirit, i nisur nga Turqia, tregon se tanket po përdoren kundër grupeve kurde.