Europarlamentarja, Tanja Fajon, është shprehur se politika shqiptare duhet ta miratojë reformën në drejtësi si kusht që vendi të ecë përpara në rrugën e hapjes së negociatave për anëtarësim në Bashkimin Europian. Në një intervistë për Oranews me gazetaren Ilva Tare, Fajon ka kërkuar edhe zbatimin e ligjit të dekriminalizimit, për të cilin parlamenti europian ka ofruar asistencen e tij nepermjet komisionerëve Edward Kukan dhe Knut Flenckenstein. Ajo gjithashtu ka lënë të hapur mundësinë e përfshirjes së Shqipërisë në çështjen e refugjatëve sirianë nëse ata do të vendosin të përdorin një rrugë tjetër nga aktualja për të shkuar në destinacion.
“Është mundësia e fundit që këtë verë Komisioni Europian duke parë implementimin, të mund të rekomandojë ditën e hapjes së negociatave në samitin e këtij dhjetori. Kjo është diçka që Sllovenia, shumë vende europiane madje edhe parlamenti europian po e kërkon. Nëse Shqipëria nuk arrin ta bëjë në fund të majit që është si një lloj afati, atëherë kam frikë se disa vite mund të humbasin”, tha europarlamentarja Fajon.
