Publikimi i të dhënave personale të ish kreu të Policisë së Shtetit, Gledis Nano ka nxjerrë në pah detaje nga puna sekrete e uniformave blu. Sipas një e-maili një burim e informonte Gledis Nanon se Talo Çela, lëvizte lirshëm në Tiranë me Audi Q8 madje dyshohet se po planifikonte edhe një vrasje.
Nano ishte vënë në dijeni se Çela ishte takuar me një personazh të njohur të botës së krimit. Një informator i policisë e ka konstatuar Çelën të qëndrojë në praninë e një personazhi të njohur të krimit në vend, i përfshirë në një konflikt të hapur me një tjetër grup kriminal që operon në zonën e Tiranës, Laçit dhe Lezhës. Sipas informacionit që shkruhej në e-mail, Talo Çela ka takuar Ervin Matën në një hotel me adresë te Rruga e Dibrës.
“Sipas informacionit, personi në kërkim Talo Çela prej disa kohësh është parë të lëvizë në Tiranë. Me datën 5 Gusht 2021 pas orës 20.00 ai ka shkuar tek një hotel me adresë tek Rruga e Dibrës. Atje ai ka shkuar i shoqëruar nga tre persona të tjerë të cilët kishin në përdorim një mjet tip golf ngjyrë gri kurse vetë udhëton me një mjet tip Audio Q8 ngjyrë blu të errët me targa gjermane. Burimi ka informuar se në këtë objekt, Talo Cela ka qenë dhe para dy javësh, rreth datave 25-26 Korrik 2021. Herën e parë, Talo është parë na makinë me një femër dhe një fëmijë kurse me datën 5 ka qenë vetëm. Sipas informacionit, Talo ÇELA ka marrë kontakt me shtetasin Ervin Mata. Sipas burimit, Ervinit i kanë thënë se me këtë duhet pasur kujdes se ka shumë kundërshtarë dhe se mund ta vrasin. Ervini i është përgjigjur që le të bëjnë cfarë të duan, për mua ka rëndësi që të mos më ndodhë ngjarje tek objekti im. Burimi i informacionit dyshon se Ervin Mata mund ta përdorë Talon për të eleminuar ndonjë nga kundërshtarët e tij. Ju bëjmë me dije se nga ana jonë është këmbëngulur se sa të sigurt e ka burimi këtë informacion dhe ai ka ngulur këmbë se është tepër e sigurt për këto takime dhe personi që e ka vënë në dijeni është lidhje e afërt e Ervin Matës dhe ngul këmbë që të ruhet pasi është një ndër personat e pakët që ka dijeni për takimet e Talos me Ervin Matën”, shkruhej në email.
Biznesmeni Ervin Mata është personi i cili mbrëmjen e 4 tetorit 2018 u përplas me armë në një nga lokalet e ish bllokut me grupin e Ervis Martinajt. Në ngjarje mbeti i vrarë Fabian Gaxha dhe u plagos Elion Hato dhe Ervis Martinaj.
