Kryetari i Partisë Demokratike Sali Berisha ka hedhur akuza të forta në drejtim të kreut të qeverisë Edi Rama. Sipas tij, ai po tallet me qytetarët dhe po i vjedh përditë.
“Çështja e dytë është tallja e Edi Ramës me shqiptarët. Rama pasi i vjedh çdo ditë në mënyrë të pangopur qytetarët e këtij vendi, ka filluar t’i tallë ata me përçmim dhe një akt i tillë është qëndrimi i tij ndaj shpenzimeve, vjedhjeve të fundit që ka bërë me dy projekte. Me projektin e instalimit në oborrin e kryeministrisë prej 4 mln eurosh arkave të drurit me vazo, një akt që kurrë një zyrtar nuk mund t’ia lejonte vetes. Një mashtrues ordiner, pasi deklaroi se nuk jap llogari unë se si i përdor paratë, unë i them se ai është i detyruar me ligj e kushtetutë për paratë e taksapaguesve shqiptarë të japë llogari për çdo qindarkë. për paratë e tij sigurisht nuk i kërkon llogari askush. Atë instalacion ta marrë ta çojë në Surrel dhe ju garantoj se do i kërkohet llogari për çdo euro të shpenzuar për të. Akt cinik.
Ju e dëgjuat vetë kontratën për satelitët. Në një akt talljeje, cinike u tha shqiptarëve se satelitët duhen sepse nuk kanë kushërinj, halla apo teze që të fshehin kullat. Sipas tij, nga qielli, 14 kate të njërës prej tyre duken më mirë se sa nga rruga. Ky është një akt i papërgjegjshëm. Me të cilin Edi Rama do të mbulojë vjedhjet që bën”, u shpreh Berisha gjatë fjalës së tij.
