Ministrat e Jashtëm të vendeve të Ballkanit perëndimor kanë zhvilluar një takim me komisionerin e BE për Zgjerimin, Johannes Hahn, gjatë punimeve në Sesionin e 71-të të Asamblesë së Përgjithshme të OKB-së.
Tema kryesore e takimit ishte diskutimi mbi angazhimet e marra nga vendet e rajonit në fushën e infrastrukturës dhe energjisë, në vazhdën e Samitit të Parisit.
Ministri Bushati gjatë fjalës së mbajtur, u ndal mbi ecurinë e krijimit të zyrës së Fondit të Ballkanit Perëndimor me seli në Tiranë, si hap i qartë që dëshmon një rol në rritje të Shqipërisë në lidhje me politikën e jashtme në rajon dhe procesin e bashkëpunimit rajonal, në funksion të normalizimit të klimës së marrëdhënieve politike dhe ekonomike ndërmjet vendeve tona.
Po ashtu, kreu i diplomacisë shqiptare foli për sfidat e sigurisë, duke evidentuar rolin dhe kontributin gjithnjë në rritje të rajonit në arkitekturën e sigurisë në kontinent.
