Kreu i PS për Qarkun e Tiranës, Saimir Tahiri ka deklaruar se Partia Socialiste nuk dëshiron një koalicion për të mbledhur vota apo për të fituar, por për të punuar.
Tahiri ka zhvilluar një takim me banorë të Paskuqanit, ku shprehet se qeverisjen e ardhshme e vendosin qytetarët dhe jo korridoret e politikës së madhe.
“Bëni gabim të mendoni se qeverisja e ardhshme vendoset në korridoret e politikës së madhe. Bëni gabim të mendoni se gjithçka vendoset atje tek korridoret e politikës së madhe që ju del tek televizori, herë me llum, herë me sharje, herë me akuza. Jo! Qeverisja e ardhshme përcaktohet këtu, në çdo kuti votimi. Qeverisja e ardhshme përcaktohet në çdo familja. Qeverisja e ardhshme përcaktohet në çdo rrugë. Qeverinë e ardhshme e keni ju në dorë, jo korridoret e politikës së jashtme.
Duhet të shash qeverinë që të dalësh në lajme, duhet të shash qeverinë që të mbledhës ca vota më shumë. Sa më shumë sulmon, aq më shumë duan të na tërheqin në vorbullën e sherrit. Sa më shumë sulmojnë, aq më shumë duan të na shpërqendrojnë nga punët. Sa më shumë sulmojnë ata, aq më shumë të vetëdijshëm dhe aq më shumë vullnet kemi për të punuar.
Përgjigja jonë është puna për çdo sulm, për çdo akuzë. Jemi të vetëdijshëm se qytetarët do të na gjykojnë për punën jo për llafet”, u shpreh Tahiri.
