Ministri i Brendshmë Saimir Tahiri deklaroi se kompanive private të policisë do tu hiqet licenca nëse nuk respektojnë ligjin dhe kriterin për pagën 330 mijë lekë për policët privatë.
I panishën në një aktivitet në qytetin e Lushnjes, Tahiri tha se policitë private nuk mund të jenë foletë ku strehohen njerëz që shfrytëzohen si skllevër
“ Ne do bëjmë gjithçka është e mundur që brenda një kohe shumë të shkurtër, të detyrojmë çdo kompani, çdo polici private që të paguajë pagën sipas ligjit për çdo polic privat. Asnjë lek më pak se sa ç‘është parashikuar në ligj. Asnjë lek më pak sesa 330 mijë lekë që është paga e parashikuar në ligj”, tha Tahiri.
Më tej Tahiri u kërkoi punojësve të policisë private që të denoncojnë çdo rast nëse punëdhënësi i tyre nuk i jep pagën sa është parashikuar në ligj.
“Na ndihmoni ju, ta bëjmë realitet këtë me informacion apo denoncime atëherë kur pronari apo administratori i kompanisë nuk e respekton këtë detyrë ligjore. Dhe ne do bëjmë maksimumin deri në heqjen e licencës për ato kompani që të respektohet ligji dhe kriteri. Të respektohet gjithçka kemi parashikuar në ligj. Kjo do të jetë beteja jonë e përbashkët. Beteja jonë pa asnjë diskutim dhe beteja juaj dhe e çdo polici privat, e secilit prej 9000 policëve privatë në Republikën e Shqipërisë”, është shprehur ministri Tahiri.
