Ish- ministri i Brendshëm Saimir Tahiri ka deklaruar se ata që janë në çadër kërkojnë qeverinë dhe më pas duan të shkojnë në zgjedhje.
Nga Kombinati, Tahiri shtron pyetjen se si mund të shtyhet dita e zgjedhjeve në emër të demokracisë, kryesocialisti i Tiranës i konsideroi lojëra politike të opozitës kërkesat e saj. Ai thotë se zgjedhjet do të zhvillohen më 18 qershor.
“Po shpikin kriza, kërkojnë shtyrjen e zgjedhjeve. Si mund të shtyhet dita e zgjedhjeve në emër të demokracisë? Vetëm këtu degjon se demokraci qënka të mos marrësh pjesë në zgjedhje, e jo e kundërta. Këto janë lojra të atyre që duan pushtetin, jo qytetarët e as Shqipërinë. Ndaj jo në 17, as në 19, por në 18 Qershor ne do jemi bashkë me shqiptarët në kutitë e votimit. Se shqipëria nuk është peng e as do jetë peng i atyre që dje ishin në pushtet për hesapet e tyre e nesër duan prap pushtet për hesapet e tyre.
Koalicioni ynë është me shqipëtarët për Shqipërinë që duam. Me ata që duan shtet, drejtësi. Me ata që duan punë, duan paga, duan dinjitet. Koalicioni më i madh është ai i njerëzve që Shqipërinë e duan më të mirë, jo më të lirë.
Shtetin e duan më të fortë, jo më të shpartalluar. Gjyqtarin të pakorruptuar, jo kokë e këmbë të korruptuar. Nuk janë partitë, por njerëzit. Është më i rëndësishëm qytetari që ka hallin e legalizimit të shtëpisë sesa politikani që do legalizimin e partisë”, tha Tahiri.
