Deputetja e Partisë Demokratike Jorida Tabaku ka akuzuar qeverinë lidhur me projektin e rrugës Kardhiq-Delvinë duke thënë se është shembulli konkret se si keqpërdoren paratë e shqiptarëve.
Tabaku ka publikuar në Facebook një dokument për financimet e këtij projektit ku sipas saj prej vitit 2018, në këtë rrugë kanë përfunduar vetëm 35 km, ndërsa projekti duhet të kishte përfunduar me kohë.
Deputetja demokrate thotë se ky projekt nisi me 5.2 mld lekë dhe më pas shkoi në 6.7 mld lekë ndërsa thotë se ndërkohë qeveria ka ndihmë më të ulët në rajon.
“A duhet të normalizojmë korrupsionin? Në shqip, fjala e urtë popullore “I kushtoi sa frëngu pulën” do të mund të kuptohej nën shembullin e rrugës Kardhiq Delvinë që nisi me një parashikim në buxhetin afatmesëm me vlerë 5.2 mld lekë dhe që më pas shkoi në 6.7 mld lekë. Kjo rrugë ka dhe një nga historitë më domethënëse se si paratë e taksave të shqiptarëve keqpërdoren vazhdimisht për t’u ofruar herë pas here shqiptarëve një copëz tuneli si një arritje e madhe. Rruga ka nisur që në vitin 2018 dhe është thuajse 35 km e gjatë, me logjikë duhet të kishte përfunduar me kohë, por nuk ka përfunduar. Njësoj si shumica e rrugëve të nisura nga kjo mazhorancë, përfshirë dhe kryeveprën e dështimit rruga e Arbrit, kjo rrugë ka pësuar rritje të vazhdueshme të shumës, dështime me tendera dhe shenja të qarta abuzimi me fondet. Vetëm vitin e fundit shpenzimet për këtë rrugë janë rritur me thuajse 30% duke treguar më shumë hallin e qeverisë për të hedhur në xhepat e kompanive që ndërtojnë këtë rrugë se sa përfundimin e saj. Sivjet jemi në një vit ku shpenzimet e çdo qytetari po rriten me nga 30%-40% ndërkohë që qeveria jonë ka ndihmën më të ulët në rajon për familjet. Fotot e bukura, projektet 3 D dhe pamjet video vetëm sa mbulojnë korrupsionin e një qeverie që i ka lënë rrugët dhe shqiptarët rrugëve”, tha Tabaku.
